ځايي سرچینې په لغمان ولایت کې وایي چې د طالبانو استخباراتو د دولتشاه ولسوالۍ د سیمهییزو پولیسو پخوانی قوماندان، محمداعظم باختر فراشغاني، یو ځل بیا نیولی دی. د سرچینو په وینا، د طالبانو ځواکونو د نوموړي د نیولو پر مهال د هغه د کورنۍ غړي هم وهلي او ټکولي دي.
سرچینو د جمعې په ورځ، د چنګاښ پنځمه، ویلي چې محمداعظم باختر فراشغاني له نیول کېدو وروسته نامعلوم ځای ته لېږدول شوی دی. د دوی په خبره، د هغه کورنۍ تر اوسه د نوموړي د ساتنې ځای او روغتیایي وضعیت په اړه هېڅ معلومات نه لري.
د سرچینو د معلوماتو له مخې، د طالبانو استخباراتو د چنګاښ په درېیمه د نوموړي د کور په شاوخوا کې چاودېدونکي توکي، وسلې او مهمات ځای پر ځای کړي او وروسته یې پر کور چاپه وهلې ده. سرچینې ادعا کوي چې طالبانو د همدې وسلو او مهماتو د موندلو په تور هغه نیولی دی.
سرچینې همدارنګه ادعا کوي چې د طالبانو استخبارات د پخواني حکومت د پوځي منسوبینو د نیولو لپاره نوې لارې چارې کاروي. د دوی په وینا، د پخوانیو نظامیانو د کورونو په شاوخوا کې د ماینونو، وسلو او مهماتو ځای پر ځای کول او وروسته د هغوی نیول، د غچ اخیستونکو اقداماتو له هغو لارو څخه دي چې طالبان یې کاروي.
محمداعظم باختر فراشغاني تر دې وړاندې هم د طالبانو د استخباراتو له خوا نیول شوی و او له څه مودې بند وروسته بېرته خوشې شوی و.
طالبانو تر اوسه د دغو ادعاوو او د نوموړي د بیا نیولو په اړه په رسمي ډول څه نه دي ویلي.
لیکواله:سلیمه آریایي
