د طالبانو او پاکستان ترمنځ د پوځي نښتو او تاوتریخوالي د زیاتېدو په ترڅ کې، د طالبانو یو بل چارواکی د رسمي لیدنو لپاره هند ته تللی دی؛ هغه اقدام چې د کابل او نوي ډیلي ترمنځ د اړیکو د پراخېدو څرګندونه کوي، چې د اسلاماباد پخوانی سیال هېواد دی.
د طالبانو د کرنې، اوبو لګولو او مالدارۍ وزیر عطاءالله عمري د سېشنبې په ورځ، د ۱۴۰۵ کال د چنګاښ ۱۶مه، د یوه رسمي پلاوي په مشرۍ نوي ډیلي ته ورسېد. هند ته له رسېدو وروسته هغه د هند د بهرنیو چارو وزارت مرستیال او د افغانستان د پالیسۍ د څانګې مسؤل آنند پراکاش هغه ته ښه راغلاست ووایه.
عطاءالله عمري څلورم طالب وزیر دی چې د رسمي سفر په ترڅ کې هند ته ځي. تر دې مخکې د طالبانو د بهرنیو چارو، عامې روغتیا او صنعت او سوداګرۍ وزیرانو هم نوي ډیلي ته سفرونه کړي وو او له هندي چارواکو سره یې لیدنې ترسره کړې او د دوه اړخیزو همکاریو د پراختیا په اړه یې خبرې کړې وې.
د هند د بهرنیو چارو وزارت ویاند رندیر جېسوال هم هند ته د طالبانو د کرنې وزیر سفر تأیید کړی او ویلي یې دي چې نوي ډیلي له کابل سره د ګډو ګټو په اړه د رغنده خبرو تمه لري.
د طالبانو د کرنې وزارت ویلي چې د دغه سفر هدف د دواړو خواوو ترمنځ د همکاریو پیاوړتیا ده، په ځانګړې توګه د کرنې، اوبو لګولو او مالدارۍ په برخو کې.
دا سفر په داسې مهال ترسره کېږي چې په وروستیو میاشتو کې د طالبانو او پاکستان اړیکې د اختلافونو او امنیتي ترینګلتیاوو له زیاتېدو سره مخامخ شوې دي.
لیکواله:سلیمه آریایي
