د طالبانو ویاند ذبیحالله مجاهد اعلان کړی چې په ۱۴۴۷ هجري قمري کال کې د افغانستان اتباعو ته نږدې دوه میلیونه برېښنايي پېژندپاڼې او له ۶۹ زرو څخه ډېر پاسپورټونه په عادي، سوداګریزو او تحصیلي برخو کې وېشل شوي دي.
مجاهد د یکشنبې په ورځ، د زمري ۱۸مه، په کابل کې یوې خبري غونډې ته، چې په آنلاین ډول له کندهار څخه خپرېده، وویل چې د طالبانو د احصایې او معلوماتو ملي ادارې په دې موده کې نږدې دوه میلیونه برېښنايي پېژندپاڼې او شاوخوا یو میلیون کاغذي پېژندپاڼې هم وېشلي دي.
د هغه په وینا، په ټولیز ډول په دې موده کې ۶۹ زره او ۷۱۷ پاسپورټونه وېشل شوي، چې له دې ډلې ۶۵ زره او ۸۶۰ عادي پاسپورټونه، ۳ زره او ۳۴۵ سوداګریز پاسپورټونه او ۵۱۲ تحصیلي پاسپورټونه دي.
د طالبانو ویاند همداراز وویل چې په ۱۴۴۷ هجري قمري کال کې د ۱۶ زره او ۱۷۱ بهرنیو اتباعو ویزې د اړوندو ادارو له خوا تایید شوي دي. هغه د دغو ویزو د غوښتونکو اړوندو هېوادونو په اړه نور جزیات نه دي وړاندې کړي.
د افغانستان برېښنايي پېژندپاڼې او پاسپورټونه لا هم د پخواني حکومت، «د افغانستان اسلامي جمهوریت»، له نښان سره صادر او وېشل کېږي. دا موضوع د طالبانو له بیا واکمنېدو راهیسې لا هم د پام وړ پاتې شوې ده.
تر دې مخکې، د طالبانو د احصایې او معلوماتو ملي ادارې ویلي وو چې د برېښنايي پېژندپاڼو د وېش له پیل راهیسې تر اوسه د افغانستان اتباعو ته له ۱۶ میلیونو څخه ډېرې پېژندپاڼې صادرې شوي دي.
د دې ادارې د اعلان شویو شمېرو له مخې، د برېښنايي پېژندپاڼو شاوخوا ۱۰ میلیونه ترلاسه کوونکي نارینه او نږدې ۶ میلیونه ښځې دي. همداراز، د دغو تذکرو تر ټولو ډېره برخه په تېرو څلورو کلونو کې وېشل شوې ده.
په افغانستان کې د برېښنايي پېژندپاڼو د وېش بهیر د ۱۳۹۷ کال د غویي په میاشت کې پیل شو. په دغو پېژندپاڼو کې د تابعیت په توګه د «افغان» کلمې درج کول او د قومیت ثبتول د دې بهیر د پلي کېدو پر مهال له بحثپارونکو موضوعاتو څخه وو.
خو د افغانستان یو شمېر اتباع وايي چې د برېښنايي پېژندپاڼو د ترلاسه کولو بهیر لا هم له ځنډ سره مخ دی او غوښتونکي د پړاوونو د بشپړولو او د دې هویتي سند د ترلاسه کولو لپاره له ځنډ سره مخ کېږي.
لیکواله:سلیمه آریایي
