راحتالله بېک، د آغاخان بنسټ اجرائیوي رئیس، او نورالدین ترابي، د طالبانو د پېښو سره د مبارزې د چمتووالي د ادارې رئیس، د ۴ میلیونه او ۱۹۱ زره ډالرو په ارزښت د ګډې همکارۍ تفاهملیک لاسلیک کړ. د دې تفاهملیک هدف د طبیعي پېښو د خطرونو د کمولو او د اضطراري چمتوالي د پیاوړتیا په برخه کې د همکاریو پراختیا بلل شوې ده.
د باختر خبري اژانس د راپور له مخې، دا تفاهملیک د طبیعي پېښو د زیانونو د کمولو لپاره د ودانیزو پروژو، د حیاتي لاسرسي لارو د جوړولو، او د اضطراري زیرمو لپاره د غیرخوراکي توکو برابرول رانغاړي.
همدارنګه د دې همکاریو په چوکاټ کې د اضطراري ځواب ویلو ټیمونو جوړول، تجهیز او روزنه، د هوا پېژندنې او د واورې د ګډو خطرونو د مدیریت په برخه کې د رضاکارانو روزنه، او د لټون او ژغورنې ټیمونو لپاره پرمختللې روزنې هم په پام کې نیول شوي دي.
د خپرو شوو معلوماتو پر بنسټ، دا پروګرامونه به د کابل، بدخشان، بغلان او بامیان ولایتونو کې تطبیق شي څو په دې سیمو کې د طبیعي پېښو د رسیدګۍ وړتیا لوړه شي.
دا تفاهملیک په داسې وخت لاسلیک کېږي چې په وروستیو اوونیو کې په یو شمېر ولایتونو کې طبیعي پېښو نه یوازې د مرګژوبلې لامل شوي، بلکې پراخ مالي زیانونه یې هم رامنځ ته کړي او ګڼ شمېر کورونه یې ویجاړ کړي او ګڼې کورنۍ بې ځایه شوي دي.
لیکواله:سلیمه آریایي
