د پاکستان د خیبر پښتونخوا په بنو سیمه کې، وسله والو کسانو د یوې سیمهییزې خیریه موسسې پر اړوند امبولانس ډزې کړي دي، چې په پایله کې یې څلورو کسانو خپل ژوند له لاسه ورکړی دی.
د پاکستان پولیس وايي چې د قربانیانو مړي د بنو مرکزي روغتون ته لېږدول شوي او د دې پېښې د څېړنو لړۍ پیل شوې ده.
د پولیسو په وینا، دا پېښه د جمعې په ورځ، د چنګاښ پنځمه، هغه مهال رامنځته شوه کله چې ناپېژنده کسانو پر امبولانس ډزې وکړې او څلور منځني عمر لرونکي نارینه په دې برید کې ووژل شول.
د امنیتي چارواکو تر اوسه د قربانیانو د هویت په اړه جزئیات نه دي وړاندې کړي.
د راپورونو له مخې، د پېښې له خبر ترلاسه کولو وروسته پولیس سیمې ته رسېدلي او هغه سیمه یې کلابنده کړې ده. یو سیمهییز چارواکی وايي چې د دې برید انګېزه لا نه ده روښانه شوې او پلټنې روانې دي.
لیکواله:سلیمه آریایي
