په افغانستان کې د اروپايي ټولنې استازې، ویرونیکا پوهار بوسکویچ، د دوشنبې په ورځ پنجشېر ولایت ته تللې او د طالبانو له سیمهییزو چارواکو سره یې لیدلي دي.
د پنجشېر د والي ویاند سیفالدین لټون ویلي، چې بوسکویچ د دغه ولایت له والي محمدآغا حکیم سره په لیدنه کې د امنیتي وضعیت ترڅنګ د پنجشېر پر پراختیايي اړتیاوو هم خبرې کړي دي.
د نوموړي په وینا، د اروپايي ټولنې استازې ویلي چې په پنجشېر کې د کرنې او روغتیا په برخو کې د یو شمېر نویو پروژو د عملي کولو پلان لري. هغې زیاته کړې چې د پنجشېر ایمرجنسي روغتون د ملاتړ لپاره شپږ میلیونه یورو ځانګړې شوي دي.
له بلې خوا، د پنجشېر والي د ولایت د اړتیاوو په اړه د خبرو پر مهال د کرنې د ودې، د اوبو لګولو کانالونو جوړولو، د استنادي دېوالونو د رغولو او د سړکونو او پلونو جوړولو ته د لومړیتوب غوښتنه کړې ده.
دواړو لورو د پنجشېر د روغتیا، کرنې او زیربناوو د پیاوړتیا په برخه کې د همکاریو پر دوام خبرې کړي دي.
لیکوال:سعید سمیر
