د طالبانو له شخصیتونو سره د اړیکو کمېسیون وایي چې ظاهر مسرور، د افغانستان د ولسي جرګې د بلخ د خلکو پخواني استازي، له دې کمېسیون څخه د مصونیت کارت ترلاسه کړی دی.
مسرور د بلخ له سیاسي څېرو څخه او د ولسي جرګې په اوولسمه دوره کې د دې ولایت د خلکو استازی و. هغه د ۱۳۹۷ لمریز کال په پارلماني ټاکنو کې له بلخ څخه ولسي جرګې ته لار وموندله او له ۲۰۱۹ څخه تر ۲۰۲۱ میلادي کلونو پورې د افغانستان د ولسي جرګې غړی و.
د دې مصونیت کارت ورکول په داسې حال کې دي چې په افغانستان کې د ملګرو ملتونو د مرستندویه پلاوي دفتر، یا یوناما، په خپل وروستي درېمیاشتني راپور کې د افغانستان په بېلابېلو برخو کې د تېر حکومت د پوځيانو د وژنو او هدفي ترورونو د دوام خبر ورکړی دی.
یوناما په دغه راپور کې د پخواني حکومت د پوځيانو او چارواکو د امنیتي او بشري حقونو د وضعیت په اړه اندېښنه څرګنده کړې او د هغو کسانو د خوندیتوب پر اړتیا یې ټینګار کړی چې له خطر سره مخ دي، او همدارنګه یې د بشري حقونو د ژمنو پر رعایت ټینګار کړی دی.
لیکواله:سلیمه آریایي
