امریکا په هرمز تنګي کې د دوو نورو سوداګریزو بېړیو له برید وروسته پر ایران د لا سختو اقتصادي فشارونو د لګولو خبرداری ورکړی دی.
د متحده عربي اماراتو د ابوظبي ملي تېلو شرکت «ادنوک» ویلي، چې د پنجشنبې په ماښام د دغه شرکت دوه بېړۍ د هرمز تنګي له لارې د تېرېدو پر مهال له برید سره مخ شوې. په پېښه کې د مرګژوبلې راپور نه دی ورکړل شوی. متحده عربي اماراتو د دغو بریدونو مسوولیت پر ایران اچولی، خو تهران تر اوسه په دې اړه سمدستي غبرګون نه دی ښودلی.
د امریکا د دفاع وزیر پېټ هېګسېت ویلي، د امریکا سمندري ځواکونه د دې وړتیا لري چې په سیمه کې د ایران پر وړاندې خپله سمندري محاصره د نامحدودې مودې لپاره وساتي. نوموړي ویلي، امریکايي بېړۍ به د اړتیا له مخې ځای پر ځای او تبدیله شي، څو په سیمه کې دوامدار حضور وساتل شي.
بلخوا د امریکا د خزانې وزیر سکاټ بیسنټ ویلي، واشنګټن پلان لري چې په راتلونکې اوونۍ کې پر ایران نوي او سخت مالي اقدامات اعلان کړي. نوموړي خبرداری ورکړی چې امریکا به د ایران پر وړاندې داسې اقتصادي فشارونه ولګوي چې د ده په وینا، د یوه هېواد د اقتصادي انزوا په تاریخ کې به بېساري وي.
په همدې حال کې، د هرمز تنګي له لارې د سوداګریزو بېړیو تګ راتګ په چټکۍ کم شوی دی. د «کپلر» د بېړیو د تعقیب معلومات ښيي چې د پنجشنبې په ورځ یوازې نهه بېړۍ له تنګي تېرې شوي، په داسې حال کې چې د جګړې له پیل مخکې هره ورځ له ۱۳۰ څخه ډېرې بېړۍ له دې ستراتیژیکې لارې تېرېدلې.
د هرمز تنګی د نړۍ د انرژۍ د لېږد له مهمو مسیرونو څخه دی، او د دغه تنګي د تګ راتګ دوامدار اختلال د نړیوالو بازارونو، د تېلو بیو او د انرژۍ د عرضې په اړه اندېښنې زیاتې کړي دي. د تېلو بیې هم د امریکا د نوي خبرداري وروسته د اوونۍ د لوړېدو پر لور روانې دي.
لیکوال:سعید سمیر
