د امریکا ولسمشر ډونالډ ټرمپ ادعا کړې چې امریکا د هرمز تنګي «سل په سلو کې» کنټرول په لاس کې لري او ایران ته د تلونکو بېړیو د تېرېدو مخه نیسي.
ټرمپ په سپینه ماڼۍ کې د یوه خبریال د پوښتنې په ځواب کې ویلي، د هرمز تنګی اوس پرانیستی دی، خو یوازې هغه بېړۍ کولای شي له دې لارې تېرې شي چې امریکا ورته اجازه ورکړي.
نوموړي زیاته کړې، هغو بېړیو ته به د هرمز تنګي له لارې د تېرېدو اجازه ورنه کړل شي چې ایران ته روانې وي.
ټرمپ ویلي، وضعیت ځکه «یو څه پېچلی» دی چې د ده په وینا، ایران کله ناکله په تنګي کې سمندري ماینونه ځای پر ځای کوي، خو امریکايي ځواکونه یې کشف او شنډوي.
هغه ادعا کړې چې امریکايي ځواکونو د هرمز تنګي په ټوله سیمه کې د ماینونو د پاکولو عملیات ترسره کړي او اوس دغه ستراتیژیک سمندري مسیر په بشپړ ډول د امریکا تر کنټرول لاندې دی.
ټرمپ همداراز ویلي چې ایران لا هم د ستونزو د رامنځته کولو توان لري، خو د ده په وینا، دغه هېواد له سخت اقتصادي وضعیت سره مخ دی. نوموړي ادعا کړې چې تهران د خپلو سرتېرو د معاشونو له ورکړې سره ستونزې لري او د لوړ انفلاسیون له امله هم تر فشار لاندې دی.
د امریکا ولسمشر ایران «په بشپړه توګه مات شوی» بللی او ټینګار یې کړی چې واشنګټن د هرمز تنګي وضعیت له نږدې څاري.
لیکوال:سعید سمیر
