لیکوال:سعید سمیر
د ماشومانو لپاره د ملګرو ملتونو ادارې (یونیسف) په خپل تازه راپور کې خبرداری ورکړی، که په افغانستان کې د نجونو پر زده کړو بندیز دوام ومومي، هېواد به تر ۲۰۳۰ کال پورې د ښځینه ښوونکو او روغتیايي کارکوونکو له جدي کمښت سره مخ شي.
راپور څرګندوي چې د طالبانو له لوري له دولس کلنۍ پورته نجونو ته د زده کړو د اجازې نه ورکولو له امله به شاوخوا ۲۰ زره ښځینه ښوونکې او نږدې ۵۴۰۰ روغتیايي کارکوونکې له زده کړو پاتې شي او په راتلونکو کلونو کې به د کار بازار ته داخلې نه شي.
یونیسف زیاتوي، د دغه بندیز له امله سمدستي له یو میلیون څخه زیاتې نجونې له زده کړو بې برخې شوې دي، چې دا وضعیت به د ښځینه کاري ځواک موجود کمښت لا پسې ژور کړي. د راپور له مخې، د ښځو په مسلکي برخه کې به اوسنی کمی شاوخوا ۲۵ سلنه نور هم زیات شي.
یونیسف ټینګار کړی چې د نجونو د زده کړو دوام نه یوازې د ښځو د حقونو مسئله ده، بلکې د افغانستان د روغتیا او پوهنې د راتلونکي لپاره هم حیاتي ارزښت لري.
