د افغانستان پخواني ولسمشر اشرف غني د لوی اختر په مناسبت افغان ملت او د نړۍ ټولو مسلمانانو ته مبارکي ویلې او له هېوادوالو یې غوښتي چې د هېواد د راتلونکي، ملي یووالي او مشروع نظام لپاره ملي بحث او ګډ تفاهم ته مخه کړي.
هغه په خپل پیغام کې د افغانستان اوسنی وضعیت اندېښمنوونکی بللی او ویلي یې دي چې هېواد له اقتصادي ستونزو، اقلیمي بدلونونو، لوږې او نړیوالې انزوا سره مخ دی. نوموړي همداراز د نجونو پر زدهکړو او د ښځو پر حقونو محدودیتونو نیوکه کړې او ټینګار یې کړی چې هېڅ ملت د ښځو له ونډې پرته پرمختګ نه شي کولای.
اشرف غني د سیمې وروستیو تحولاتو ته په اشارې ویلي، چې افغانستان د سیمې د ثبات لپاره مهم رول لري او باید د ملي اجماع، سولې او اقتصادي محور سیاست پر لور حرکت وکړي. هغه دا هم ویلي چې هېڅ اختلاف باید د افغانانو ترمنځ د تاوتریخوالي او جګړې لامل نه شي.
لیکوال:سعید سمیر
