د ملګرو ملتونو د کډوالۍ نړیوال سازمان (IOM) د تازه شمېرو له مخې، د ۲۰۲۶ کال د اپرېل او جون میاشتو ترمنځ له ۱.۰۷ میلیونو ډېر سرحدي تګ راتګونه د افغانستان، ایران او پاکستان ترمنځ ثبت شوي دي.
د دغو تګ راتګونو ډېره برخه افغانستان ته د خلکو په داخلېدو پورې تړاو لري؛ په ټولیز ډول له هرو پنځو سرحدي حرکتونو څخه څلور یې افغانستان ته د ننوتلو په موخه ترسره شوي دي.
د دغه سازمان د معلوماتو له مخې، د ۲۰۲۶ کال په دویمه ربع کې ۸۶۶ زره او ۵۷۹ کسان افغانستان ته داخل شوي چې ۶۸ سلنه، یعنې شاوخوا ۵۸۶ زره او ۵۰۰ کسان، بېرته راستنېدونکي افغانان وو.
د راپور له مخې، له ایرانه افغانستان ته د راغلو کسانو ۵۶ سلنه ویلي چې له دغه هېواده اخراج شوي دي. همداراز، له پاکستانه د راغلو کسانو ۶۶ سلنه ویلي چې د ناخوندیتوب او فشارونو له امله افغانستان ته بېرته ستانه شوي دي.
په همدې موده کې، د IOM د معلوماتو له مخې، ایران ته د تلونکو افغانانو ۶۵ سلنه د خپل سفر اصلي لامل د کار موندل بللی، په داسې حال کې چې پاکستان ته د تلونکو افغانانو ۵۵ سلنه ویلي چې دغه هېواد ته د درملنې لپاره تللي دي.
د افغانستان پر پولو تګ راتګ په بهیر کې د بېرته راستنېدونکو افغانانو ونډه په داسې حال کې لوړېږي چې په ګاونډیو هېوادونو کې د افغان کډوالو او مهاجرینو پر وړاندې فشارونه دوام لري.
لیکوال:سعید سمیر
