د افغانستان د کرېکټ د ستوري، راشد خان تازه انځورونه د هغه د زوی «ازلان» ترڅنګ د انګلستان په «دي هانډرډ» لیګ سیالیو کې د هغه له ځلا وروسته، په ټولنیزو شبکو کې په پراخه کچه لاس په لاس کېږي او د کاروونکو له تاوده هرکلي سره مخ شوي دي.
راشد خان چې د ایم آی لنډن لوبډلې په ترکیب کې لوبېږي، د یکشنبې په ورځ (د زمري ۱۱مه) د منچسټر سوپر جائنټس پر وړاندې په لوبه کې خورا ښې لوبې وښودلې. هغه د ۵ ویکټو په اخیستو او یوازې د ۱۷ منډو په ورکولو سره د لوبې د غوره لوبغاړي جایزه ترلاسه کړه.
په یوه خپاره شوي انځور کې راشد خان لیدل کېږي چې خپل زوی «ازلان» یې په غېږ کې اخیستی او د کرېکټ په میدان کې ولاړ دی. دا انځور د لوبې تر پای ته رسېدو وروسته اخیستل شوی او په چټکۍ سره په ورزشي پاڼو او ټولنیزو شبکو کې خپور شوی دی.
راشد خان د دغو انځورونو په خپرولو سره لیکلي چې دا لومړی ځل و چې زوی یې د هغه لوبه له نږدې کتله. هغه دا ورځ د خپل ژوند له خورا یادګاري شیبو څخه وبلله او د خپل زوی د شتون ترڅنګ په لوبه کې بریا یې یوه ځانګړې تجربه وبلله.
د افغانستان د کرېکټ دغه ستوري د خپل پیغام په یوه برخه کې لیکلي: «یوه ځانګړې ورځ چې تل به زما په یاد وي. دا لومړی ځل و چې زما واړه زوی زما لوبه له نږدې کتله او له نېکهمرغه د لوبې د غوره لوبغاړي جایزه مې هم ترلاسه کړه. ازلان زما تر ټولو لوی ملاتړی، تر ټولو لویه لورېینه او د ژوند نیکمرغي ده.»
لیکواله:سلیمه آریایي
