ځایي سرچینو رسنیو ته تایید کړې چې د طالبانو ځواکونو د شنبې په ورځ د هرات ښار په ۶۴ متره سړک کې، د الماس شرق سوداګریز مارکېټ مخې ته، شاوخوا ۲۰ ښځې نیولې دي.
د سرچینو د معلوماتو له مخې، دغه پېښه شنبې، د ۲۰۲۶ کال د جون په ۶مه، رامنځته شوې او د نیول شویو کسانو په ډله کې یوه امیندواره ښځه هم شامله ده. خو تر اوسه د نیول شویو ښځو د هویت، د نیولو د لامل او هغه ځای په اړه چې ور لېږدول شوي دي، جزئیات نه دي خپاره شوي.
سرچینو زیاته کړې چې له دې پېښې وروسته د سیمې فضا ترینګلې شوې او یو شمېر اوسېدونکو په عامه ځایونو کې د ښځو د نیولو د دوام په اړه اندېښنه څرګنده کړې ده.
د سرچینو په وینا، طالبانو د دغو ښځو له نیولو وروسته هغوی نامعلوم ځای ته لېږدولي دي. تر اوسه د نیول شویو کسانو د وضعیت او برخلیک په اړه خپلواک معلومات نه دي ترلاسه شوي.
د خبر تر خپرېدو پورې په هرات کې طالب چارواکو د دې راپور په اړه کوم غبرګون نه دی ښودلی، او کابل ټایمز نیوز ویلي چې د لا زیاتو معلوماتو د ترلاسه کولو او د طالب چارواکو د نظر د اخېستلو هڅه کوي.
دا راپور داسې مهال خپرېږي چې په وروستیو ورځو کې ځايي سرچینو د هرات ښار په ځینو سیمو کې د ښځو پر حضور او پوښاک د څارنې او محدودیتونو د زیاتېدو خبر ورکړی و.
لیکواله:سلیمه آریایي
