طالبانو د پنجشنبې په ماښام، د واک ته د دې ډلې د رسېدو د پنځمې کلیزې په مناسبت، د افغانستان د ملي راډیو او ټلوېزیون په تالار کې د شعر ویلو مراسم جوړ کړل. په هغو انځورونو کې چې له دې مراسمو خپاره شوي، د طالبانو یو شمېر چارواکي لیدل کېږي چې له ځیرکو موبایلونو څخه کار اخلي.
دا انځورونه په داسې حال کې خپرېږي چې تر دې مخکې د طالبانو د غړو او دولتي کارکوونکو لپاره د هوښیار موبایلونو د کارولو د بندیز په اړه یو راپور خپور شوی و. د هغه سند له مخې چې د ۱۴۰۵ لمریز کال په غبرګولي میاشت کې ترلاسه شوی و، د طالبانو مشر هبتالله اخوندزاده په یوه شفاهي حکم کې د ځیرکو موبایلونو کارول منع کړي دي.
د دغه سند له مخې، هغه کسان چې له دې حکم څخه سرغړونه وکړي، «مجرم» به وپېژندل شي او له هغوی سره به قضايي چلند وشي. په حکم کې همداراز ویل شوي چې سرغړوونکي به پوځي محکمو ته ور وپېژندل شي.
د طالبانو عدلیې وزارت دغه حکم د هېواد په اتو زونونو کې د طالبانو د سترې محکمې د نظامي مرستیالۍ اړوندو پوځي محکمو رئیسانو ته رسولی دی. د دغو زونونو امنیه قوماندانان او د استخباراتو رئیسان هم له دې حکم څخه خبر کړل شوي دي.
د دغه فرمان له صادرېدو وروسته، د طالبانو د یو شمېر ټیټپوړو دولتي کارکوونکو ترمنځ یو کمپاین پیل شو. ځینو دغو کارکوونکو خپل هوښیار موبایلونه مات کړل او د دې کار انځورونه او ویډیوګانې یې پر ټولنیزو رسنیو خپرې کړي.
هبتالله اخوندزاده د انځور اخیستلو او ویډیو جوړولو مخالف دی او دا کار د خپلې شرعي برداشت خلاف بولي. په تېرو نږدې پنځو کلونو کې د هغه یوازې یو رسمي انځور خپور شوی چې هغه هم د پاسپورټ عکس دی.
تر اوسه د هبتالله اخوندزاده د عامه حضور بل کوم رسمي انځور یا ویډیو نه ده خپره شوې او هغه نږدې په بشپړه توګه له عامه صحنې او رسنیو لرې ساتل شوی دی. د ځیرکو موبایلونو د کارولو او د انځورونو او ویډیوګانو د خپرولو محدودیت هم د طالبانو د چارواکو ترمنځ د اختلاف له مهمو موضوعاتو څخه ګرځېدلی دی.
د دغه حکم له صادرېدو وروسته، د طالبانو یو شمېر ادارو او چارواکو د خپلو فعالیتونو د انځوریزو او ویډیويي راپورونو خپرول ودرول. خو له دې سره سره، ځینې چارواکي او ادارې لا هم د انځورونو او ویډیوګانو خپرولو ته دوام ورکوي او دغه حکم نه رعایتوي.
د ځیرکو موبایلونو د کارولو د بندیز عملي کېدو د طالبانو د یو شمېر دولتي ادارو فعالیتونه هم له ستونزو سره مخ کړي دي. دولتي کارکوونکو ویلي چې د واټساپ او برېښنالیک په څېر د وسایلو د محدودېدو له امله، د اداري مکتوبونو او همغږۍ یوه د پام وړ برخه له ستونزو سره مخ شوې ده.
د طالبانو د واک ته د رسېدو د پنځمې کلیزې له مراسمو څخه خپاره شوي انځورونه، چې په کې د دې ډلې یو شمېر چارواکي له ځیرکو موبایلونو سره لیدل کېږي، یو ځل بیا دا موضوع راپورته کړې چې دغه بندیز په څه ډول عملي کېږي او د طالبانو چارواکي تر کومه حده ورته ژمن دي.
لیکواله:سلیمه آریایي
