د هغه مکتوب له مخې چې یوه کاپي یې ترلاسه شوې، د طالبانو ریاستالوزرا د هغه څه لپاره چې «په بدخشان کې د هر ډول ګواښ د مخنیوي» په نوم یاد شوي، ۵۰ میلیونه افغانۍ ځانګړې کړي دي. په دې مکتوب کې راغلي چې د طالبانو د دفاع وزارت ته دنده سپارل شوې چې په دې ولایت کې د سراسري حاکمیت د ټینګښت او د امنیتي ګواښونو د مخنیوي لپاره ځانګړي عملیات طرحه او عملي کړي.
د دې سند له مخې، ملا یعقوب مجاهد، د طالبانو د دفاع وزیر، د روان کال د غبرګولي په میاشت کې له ملا حسن اخوند، د طالبانو د ریاستالوزرا له مشر، څخه غوښتنه کړې وه چې د دغو عملیاتو د ترسره کولو لپاره ۵۰ میلیونه افغانۍ ځانګړې کړي.
ملا حسن اخوند له دې غوښتنې سره موافقه کړې او د طالبانو د مالیې وزارت ته یې لارښوونه کړې چې دغه پیسې د دفاع وزارت د ۱۴۰۵ مالي کال له منظورې شوې بودجې څخه، په قطعي ډول او د معتمد حساب له لارې، ورکړي.
په دې مکتوب کې ټینګار شوی چې دا بودجه په بدخشان ولایت کې د امنیتي پروګرامونو د پلي کولو لپاره ځانګړې شوې ده. خو د طالبانو چارواکو تر اوسه د دې سند د جزئیاتو یا د عملیاتو د دقیقو موخو په اړه په رسمي ډول څه نه دي ویلي.
دا اقدام په داسې حال کې ترسره کېږي چې په وروستیو اوونیو کې راپورونه په بدخشان ولایت کې د طالبانو ترمنځ د کورنیو اختلافاتو او کړکېچونو د زیاتېدو خبر ورکوي. د راپورونو له مخې، د طالبانو یو شمېر سیمهییز قوماندانان او تاجکتوکمه غړي د دې ډلې د مرکزي مشرانو له ځینو لارښوونو څخه سرغړونه کوي.
ویل کېږي چې دغه اختلافات وروسته له هغې لا پسې زیات شول چې د طالبانو د یوه سیمهییز قوماندان، جمعه فاتح، ځینې اړوند کسان د کانونو د استخراج په فعالیتونو د لاس لرلو په تور ونیول شول. ځايي سرچینې وایي چې جمعه خان فاتح خپل ځواکونه د احتمالي پوځي نښتې لپاره چمتو کړي او د جګړې د رامنځته کېدو اندېښنې زیاتې شوي دي.
هممهاله، د طالبانو مشر تېره اوونۍ د دغو اختلافاتو د حل او د ښکېلو لورو سره د خبرو لپاره یو پلاوی ټاکلی دی. خو ځايي سرچینې وایي چې دغه خبرې تر اوسه کومې څرګندې پایلې ته نه دي رسېدلي.
لیکواله:سلیمه آریایي
