د احصایې نړیوالې ادارې د وروستي راپور له مخې، د ۲۰۲۶ کال د فوټبال نړیوال جام چې د امریکا، کاناډا او مکسیکو په ګډ کوربهتوب ترسره کېږي، د لګښتونو اټکل له ۸ تر ۱۴ میلیارده امریکایي ډالرو پورې رسېږي.
په راپور کې ویل شوي چې دا لګښتونه د لوبغالو د چمتووالي، امنیتي تدابیرو، ترانسپورټي اسانتیاوو او د سیالیو د تنظیمي چارو لپاره ځانګړې کېږي. د کارپوهانو په وینا، ځکه چې دغه درې هېوادونه مخکې له مخکې پرمختللې ورزشي او ترانسپورټي زیربناوې لري، نو د نوو تاسیساتو اړتیا کمه ده او له همدې امله لګښتونه هم نسبتاً ټیټ اټکل شوي دي.
په مقابل کې، د ۲۰۲۲ کال نړیوال جام چې په قطر کې ترسره شو، د تاریخ تر ټولو ګران سپورټي پېښه بلل کېږي. د ځینو اقتصادي ارزونو له مخې، د قطر د نړیوال جام ټولیز لګښت شاوخوا ۲۲۰ میلیارده ډالرو ته رسېدلی، ځکه چې هلته د لوبغالو، ترانسپورټ او ښاري زیربناوو لپاره له صفره سترې پروژې جوړې شوې وې.
شنونکي وایي، د نړیوال جام د لګښتونو توپیر د کوربه هېوادونو له اقتصادي ظرفیت، موجودو زیربناوو او د نوو پروژو له کچې سره مستقیم تړاو لري. دوی زیاتوي چې د ۲۰۲۶ نړیوال جام به له اقتصادي پلوه د پخوانیو سیالیو په پرتله سپک او مدیریتکېدونکی وي.
لیکوال:سعید سمیر
