د روسیې د علم او کلتور مرکز په کابل کې د اسلاوي لیک او کلتور له ورځې څخه لمانځنه وکړه. دغه مرکز د یکشنبې په ورځ، د غبرګولي درېیمه، اعلان وکړ چې دا مراسم د اسلاوي ملتونو د لیکدود، زدهکړو او څو پېړیو لرغونو دودونو د تاریخ د معرفي کولو په موخه جوړ شوي وو.
د خپرې شوې خبرپاڼې له مخې، پروګرام د لیکدود د تاریخ په اړه د یوې ویډیو په خپرولو پیل شو؛ هغه ویډیو چې د پوهې د لېږد بهیر یې له لومړنیو طریقو څخه د الفباتورو تر رامنځته کېدو او د زدهکړو او ادبیاتو په پراختیا کې د هغې تر رول پورې انځور کړی و.
د مراسمو په بله برخه کې، د اسلاوي الفبا د تورو هنري او تصویري تفسیرونو نندارتون جوړ شوی و او لیدونکي د دې الفبا له کلتوري او تاریخي اړخونو سره بلد شول.
اسلاوي کلتور د اسلاوي ملتونو ګډ میراث ته اشاره کوي، چې پکې روسان، اوکراینیان، بلاروسیان، صربان، بلغاریان، پولندیان او یو شمېر نور ملتونه شامل دي. دغه کلتور په لرغوني تاریخ، اسلاوي ژبو، کلاسیکو ادبیاتو، موسیقۍ، فولکلور، دودیزو مراسمو او معنوي ارزښتونو ولاړ دی.
په دې پروګرام کې د وړاندې شویو معلوماتو پر بنسټ، اسلاوي کلتور د تاریخ په اوږدو کې د ارتودوکس مسیحیت پراخ اغېز منلی او دا اغېز د سلاوي ملتونو په بېلابېلو کلتوري او ټولنیزو برخو کې لیدل کېږي.
لیکواله:سلیمه آریایي
