د طالبانو د بهرنیو چارو وزارت اعلان کړی چې د پاکستان د تېرې شپې د هوایي بریدونو په تعقیب یې په کابل کې د دغه هېواد د سفارت شارژدافیر احضار کړی دی.
د دغه وزارت په خبرپاڼه کې ویل شوي چې د افغانستان د هوايي حریم د نقض او په کونړ، پکتیا او پکتیکا ولایتونو کې د ملکي وګړو د کورونو د بمبارولو په اړه پاکستاني لوري ته «شدید او قاطع اعتراض» وړاندې شوی دی.
په اعلامیه کې دغه بریدونه د «پاکستان د متجاوز پوځي رژیم» پورې تړل شوي او ویل شوي چې د دې بریدونو په پایله کې ۳۶ ملکي وګړي، چې ښځې او ماشومان هم په کې شامل دي، وژل شوي او ۱۶۳ نور ټپیان شوي دي.
د طالبانو د بهرنیو چارو وزارت ټینګار کړی چې دا ډول پوځي اقدامات کولی شي د دواړو لورو پر اړیکو منفي اغېز وکړي او له پاکستانه یې د افغانستان د هوايي حریم د نقض د درولو غوښتنه کړې ده.
پاکستان تر اوسه د طالبانو له لوري د شوې احضارې او لګول شوو تورونو په اړه رسمي غبرګون نه دی ښودلی.
لیکواله:سلیمه آریایي
