د «فایننشال ټایمز» ورځپاڼې د یکشنبې په ورځ راپور ورکړی چې د «اوبر» شرکت د خپل خوراکي توکو د تحویلي خدماتو د پراخولو پلان په ډېری نویو اروپايي بازارونو کې درولی دی. دا پرېکړه په داسې حال کې شوې چې دغه شرکت لا هم هڅه کوي د جرمني شرکت «ډیلیوري هیرو» وپېري.
د راپور له مخې، اوبر نور پلان نه لري چې تر روان کال پورې خپل د خوراکي توکو د تحویلي خدمات په ۷ بازارونو کې په ۵ هېوادونو کې پیل کړي. اتریش، ناروې او یونان له هغو هېوادونو څخه دي چې د دې پلان پلي کول پکې درول شوي، خو د نورو دوو هېوادونو نومونه لا نه دي اعلان شوي.
اوبر مخکې اعلان کړی و چې سږ کال به خپل خدمات په اوو نویو اروپايي بازارونو کې پراخ کړي، چې اتریش، ډنمارک، فنلنډ، ناروې، د چک جمهوریت، یونان او رومانیا پکې شامل وو. شرکت اټکل کړی و چې د دې پلان پلي کېدل به په راتلونکو درېیو کلونو کې د هغې د مجموعي فرمایشونو ارزښت شاوخوا ۱ میلیارده ډالر زیات کړي.
فایننشال ټایمز همدارنګه راپور ورکړی چې اوبر لا هم د «ډیلیوري هیرو» د اخیستلو هڅه کوي. دغه جرمني شرکت په مې میاشت کې ویلي وو چې له اوبر څخه یې د هر سهم د ۳۳ یورو په ارزښت د اخیستلو وړاندیز ترلاسه کړی دی.
رویټرز خبري اژانس مخکې راپور ورکړی و چې اوبر د پانګونې د شرکت «اسپکس منیجمنټ» د یوې برخې د سهامو په اخیستو سره په ډیلیوري هیرو کې خپله ونډه له ۲۵ سلنې څخه شاوخوا ۳۷ سلنې ته لوړه کړې ده.
ډیلیوري هیرو د دې موضوع په اړه له تبصرې ډډه کړې، او اوبر هم د رویټرز د وضاحت غوښتنې ته ځواب نه دی ویلی.
اوبر فایننشال ټایمز ته ویلي چې په فنلنډ او ډنمارک کې د خوراکي توکو د تحویلي خدماتو د «ستر بریالیتوب» وروسته یې پرېکړه کړې چې د نویو بازارونو د پراخولو پلان ودروي او په موجوده بازارونو کې د خپلو فعالیتونو په پراخولو تمرکز وکړي.
لیکواله:سلیمه آریایي
