د رسنیو د راپورونو له مخې، د هسپانیې په پامپلونا ښار کې د «سن فرمین» کلني غویي ځغلولو جشن د څلورمې ورځې پر مهال لږ تر لږه ۹ کسان ټپیان شوي دي. دغه پېښه د جمعې په ورځ، د چنګاښ په ۱۹مه، چې د جولای له ۱۰مې سره برابره ده، ترسره شوې ده.
د «ایاېمپي» خبري اژانس راپور ورکړی چې د دې جشن څلورمه برخه د ګډونوالو لپاره له پېښو ډکه ورځ وه. د دغې رسنۍ په وینا، ځینې ټپیان د غویانو د ښکرونو له لګېدو سخت ژوبل شوي او یو کس د سر له ناحیې زیانمن شوی دی.
د راپور له مخې، یو شمېر نور ګډونوال وروسته له هغه د لاسونو او پښو له برخو ټپیان شوي چې د غویانو تر پښو لاندې لوېدلي وو. همدارنګه، یو جرمن وګړی د دې پېښې له امله د خپل چپ لاس د مړوند هډوکی مات کړی دی.
ایاېمپي زیاته کړې چې د سږ کال د سن فرمین جشن څلورمه ورځ له درېیو دقیقو کمه روانه وه او د پېښې له رامنځته کېدو وروسته پای ته ورسېده.
په دې جشن کې، لومړی غويي د پامپلونا ښار په تنګو او ډبرو پوښل شویو کوڅو او واټونو کې خوشې کېږي، او زرګونه کسان په ټاکلې لاره له هغوی سره منډې وهي، څو غويي د ښار اصلي د غويي جنګ میدان، «پلازا د توروس د پامپلونا»، ته ورسېږي.
له دې لارې د تېرېدو وروسته، په میدان کې د مسلکي غويي جنګیالیو په ګډون د غويي جنګ ننداره ترسره کېږي. دا سیالۍ عموماً د مراسمو تر پای پورې دوام کوي، خو کله ناکله د پېښو له امله پروګرام درول کېږي یا له وخته مخکې پای ته رسېږي.
د سن فرمین جشن د هسپانیې له تر ټولو مشهورو دودیزو مراسمو څخه ګڼل کېږي او هر کال زرګونه ګډونوال او سیلانیان د هسپانیې او نړۍ له بېلابېلو برخو څخه پامپلونا ته راجلبوي. خو له بلې خوا، دا جشن تل د څارویو د حقونو د ملاتړو ډلو له نیوکو سره مخ شوی دی.
د سږني جشن له ترسره کېدو سره هممهاله، د څارویو د حقونو یو شمېر فعالانو چې د «پېټا» له سازمان سره تړاو لري، اعتراضي غونډه جوړه کړه او د غويي جنګ پر ضد یې خپل مخالفت څرګند کړ. اعتراض کوونکو د «غويي جنګ ګناه ده» په شعارونو لیکل شوي لوحې پورته کړې او دغه دود یې د څارویو د وژلو یوه بڼه وبلله او د پای ته رسېدو غوښتنه یې وکړه.
ایکواله:سلیمه آریایي
