په مغولستان کې د اسیا د تکوانډو د اووه ویشتم پړاو سیالیو په دوام، د افغانستان دوه ملي لوبغاړي حکمتالله زین او محمد اشرف شکران له خپلو سیالانو سره سیالۍ کوي. دغه دوه افغان ورزشکاران به د هانګ کانګ او تاجیکستان د استازو پر وړاندې مهمې لوبې ترسره کړي.
حکمتالله زین، چې د افغانستان د منفي ۶۸ کیلوګرام وزن استازی دی، د یو شپاړسم پړاو په لوبه کې به د هانګ کانګ له فونګ لووای سره مخامخ شي. که نوموړی دغه سیالي وګټي، نو په یو اتم پړاو کې به د قزاقستان، بحرین او اردن د لوبغاړو ترمنځ د بریالي سیال پر وړاندې مبارزه وکړي.
په بله سیالۍ کې، محمد اشرف شکران، چې د افغانستان د منفي ۸۰ کیلوګرامه وزن ملي لوبغاړی دی، د یو شپاړسم پړاو په لوبه کې به د تاجیکستان له فضیلوف اسلانبیک سره سیالۍ وکړي.
شکران که په دې لوبه کې بریالی شي، نو په راتلونکي پړاو کې به د اوزبیکستان له جسوربیک جایسانف سره مخ شي؛ هغه لوبغاړی چې په لومړي پړاو کې یې استراحت درلود.
د اسیا د تکوانډو اتلولۍ سیالۍ، چې د ۲۰۲۶ کال د جاپان ناګویا اسیايي لوبو د غوراوي پړاو هم ګڼل کېږي، د مې له ۲۱مې تر ۲۵مې نېټې پورې د مغولستان په کوربتوب د ۴۲ اسیايي هېوادونو د ورزشکارانو په ګډون ترسره کېږي.
تر اوسه هېڅ افغان ورزشکار ونه توانېد چې د ۲۰۲۶ اسیايي لوبو لپاره سهمیه ترلاسه کړي. له دې وړاندې علياکبر امیري، آزاد بېګ نوروزي او امید سهاک په خپلو لومړیو سیالیو کې ماته وخوړه، او احسام رحیمي هم په خپله دویمه مبارزه کې د خپل سیال پر وړاندې مات شو او له سیالیو بهر شو.
لیکواله:سلیمه آریایي
