د ازبېکستان امنیتي چارواکو یو افغان وګړی د سرخاندریا ولایت په ترمذ نړیوال سوداګریز مرکز کې د تریاکو د پلورلو په تور نیولی دی. د ازبېکستان د دولت د امنیت خدمت ویلي چې د دې پېښې په تړاو د نوموړي پر وړاندې جنایي دوسیه پرانیستل شوې او د احتمالي همکارانو د پېژندلو لپاره څېړنې روانې دي.
د دغه بنسټ د راپور له مخې، نیول شوی کس هغه مهال وپېژندل شو او ونیول شو چې غوښتل یې ۵۰۶ ګرامه تریاک وپلوري. د ازبېکستان د چارواکو په وینا، دغه افغان وګړي غوښتل د نشهیي توکو یاده جوپه د ۲۵۰۰ امریکايي ډالرو په بدل کې وپلوري. د هغه د نیولو عملیات د دولت د امنیت خدمت، د ګمرک ادارې او د سرخاندریا ولایت د پولیسو په همکارۍ ترسره شوي دي.
لومړنۍ څېړنې ښيي چې دغه افغان وګړی، چې په ۲۰۰۳ کال کې زېږېدلی، نشهیي توکي یې په پنځو بستو کې د خپل بدن دننه پټ کړي وو. د ازبېکستان د چارواکو د راپور له مخې، د دې کار موخه دا وه چې جوپه له پولې واړوي او له ګمرکي او سرحدي پلټونکو څخه یې پټه وساتي.
ویل شوي چې دغه کس ازبېکستان ته له ننوتلو وروسته د نشهیي توکو د جوپې د سپارلو لپاره د ترمذ نړیوال سوداګریز مرکز ته د لیدنې ځای ته تللی و. امنیتي ځواکونو د یوه عملیات په ترڅ کې هغه په همدې ځای کې ونیو او د تریاکو جوپه یې هم له هغه څخه کشف او ضبط کړه.
د ترمذ نړیوال سوداګریز مرکز د ازبېکستان د سرخاندریا ولایت په یوه ځانګړې اقتصادي او سوداګریزه سیمه کې موقعیت لري، چې د افغانستان له پولې او د حیرتان له سرحدي دروازې سره نږدې دی. دغه مرکز د ۱۴۰۳ لمریز کال په وږي میاشت کې په رسمي ډول پرانیستل شو او د افغانستان او ازبیکستان ترمنځ د سرحدي سوداګرۍ د اسانتیا په موخه جوړ شوی دی.
د دغه مرکز د جوړېدو موخه د دواړو هېوادونو سوداګرو ته د مناسبو شرایطو برابرول، د سرحدي سوداګرۍ د بهیر اسانتیا او د افغانستان او ازبېکستان ترمنځ د اقتصادي اړیکو پراخول بلل شوي دي. یاد مرکز پولې ته د نږدې موقعیت له امله، سوداګریز فعالیتونه او تګراتګ پکې د اړوندو ادارو له خوا تر څارنې لاندې دی.
دا پېښه په داسې حال کې راپور شوې چې د ازبېکستان امنیتي ځواکونو تر دې مخکې هم د سرخاندریا ولایت، چې له افغانستان سره ګډه پوله لري، څو ځله د نشهیي توکو جوپې کشف او ضبط کړي دي. د ازبېکستان چارواکي وايي چې د نوې دوسیې په اړه څېړنې او د دې جوپې په لېږد او پلور کې د نورو کسانو د احتمالي لاس لرلو په اړه تحقیقات لا هم دوام لري.
لیکواله:سلیمه آریایي
