فاطمه جعفري، د افغانستان سوک وهونکې نجلۍ، د «صلح برای بلوچستان» په نړیوالو سوک وهنې سیالیو کې وتوانېدله چې د افغانستان لپاره خپل دوهم د اتلولۍ کمربند ترلاسه کړي. هغې مخکې هم د پاکستان په کویټې ښار کې د اتلولۍ کمربند ګټلی و او دا ځل یې هم دا ویاړ تکرار کړ.
فاطمه جعفري باید په پایلوبه کې د پاکستاني سیالې پر وړاندې مبارزه کړې وای؛ خو دا مسابقه د پاکستاني ورزشکارې د نه حاضرېدو له امله ونه شوه او داورانو بریا د دې افغان ورزشکارې په ګټه اعلان کړه. په همدې توګه، د دې سیالیو اتلولۍ کمربند فاطمې جعفري ته ورکړل شو.
د راپورونو له مخې، د فاطمې جعفري پاکستانۍ سیاله د وزن اخیستلو په مراسمو کې حاضره وه او د مسابقې په ورځ یې هم د سیالۍ تالار ته راغلې وه؛ خو ډګرته له دننه کېدو څخه یې ډډه وکړه.
فاطمه جعفري د فجر سوک وهنې اکاډمۍ کې او د بسمالله ناصح تر نظر لاندې، چې د افغانستان د سوک وهنې پیژندل شوی روزونکی دی، تمرین کوي. هغې تر اوسه په خپلو درې مسلکي مبارزو کې بریا ترلاسه کړې او دوه د اتلولۍ کمربندونه یې ګټلي دي.
لیکواله:سلیمه آریایي
