د اروپا د ۱۷ هېوادونو د فوټبال د لوبغاړو اتحادیو، چې فرانسه، ایټالیا او هالنډ هم پکې شامل دي، د فیفا پر ضد له یوې ډلهییز حقوقي شکایت څخه خپل ملاتړ وروسته له هغې واخیست چې د فوټبال د ادارې او د لوبغاړو د لېږد د مقرراتو د اصلاحاتو په اړه یوې هوکړې ته ورسېدل.
دا پرېکړه د جون په ۱۰مه د فیفا او د فوټبال د لوبغاړو د نړیوالې اتحادیې (فیفپرو) ترمنځ د همکارۍ د تفاهملیک له لاسلیک وروسته وشوه. دغه تړون، چې د ۲۰۳۱ کال تر پایه اعتبار لري، د لومړي ځل لپاره لوبغاړو ته د نړۍ د فوټبال د پرېکړو په بهیر کې رسمي ځای ورکوي او د ډلهییزو خبرو اترو د اصولو پر بنسټ د «نړیوال ټولنیز ډیالوګ پلاټفورم» رامنځته کوي.
ډلهییز شکایت د ۲۰۲۵ کال په اګست کې د هالنډ د «لوبغاړو لپاره عدالت» بنسټ له خوا ثبت شوی وه. شکایت کوونکو ادعا کړې وه چې د فیفا د لوبغاړو د لېږد محدودوونکي مقررات د لوبغاړو د ازاد تګ راتګ حق تر پښو لاندې کوي او د هغوی د معاشونو د کمېدو لامل شوي دي. دا دوسیه وروسته له هغې رامنځته شوه چې د اروپایي ټولنې د عدالت محکمې د فیفا د لېږد د ځینو مقرراتو پر ضد پرېکړه وکړه.
د لوبغاړو اتحادیو په یوه ګډه اعلامیه کې ویلي چې د لوبغاړو د وضعیت او لېږد په مقرراتو کې نوي اصلاحات د دوی تر ټولو مهمې اندېښنې حل کړي دي. له همدې امله، دوی نور د دې شکایت دوامداره بنسټیز ملاتړ اړین نه ګڼي. خو لوبغاړي لا هم کولای شي چې د تاوان د ترلاسه کولو لپاره په انفرادي ډول له قانوني لارو چارو ګټه واخلي.
فیفا هم تر دې وړاندې اعلان کړی و چې د جون میاشتې په لومړیو کې یې د چېلسي، ارسنال او ریال مادرید پخواني منځني لوبغاړي، لاسانا دیارا، چې د دې حقوقي قضیې پیل کوونکی و، سره له محکمې بهر جوړجاړی کړی دی.
لیکواله:سلیمه آریایي
