د پاکستان د پخواني لومړي وزیر عمران خان خور علیمه خان وايي، چې عمران خان پنجشنې د شپې شاوخوا یوه بجه د درملنې لپاره له اډیاله زندان څخه الشفا روغتون ته لېږدول شوی دی.
علیمه خان ویلي، چې د عمران خان بله خور، ډاکټر عظمي، او کورنی ډاکټر یې اوس مهال په روغتون کې له هغه سره دي.
د پاکستان د سترې محکمې د امر له مخې، ۷۳ کلن عمران خان د طبي معایناتو او درملنې لپاره روغتون ته انتقال شوی دی.
د خیبر پښتونخوا اعلی وزیر سهیل اپریدي هم تر دې مخکې ویلي وو، چې د عمران خان معاینات او درملنه به د هغه د کورنۍ او شخصي ډاکټرانو په حضور کې په الشفا روغتون کې ترسره کېږي.
عمران خان په ۲۰۲۲ کال کې د پارلمان له لوري د نه باور رایې له لارې له واکه له لرې کېدو وروسته په څو قضیو کې محکوم او تورن شوی دی. پر هغه د دولتي ډالیو د پلور، پر پوځي او دولتي ودانیو د تاوتریخوالي د هڅولو او ناقانونه واده په ګډون تورونه لګېدلي، خو نوموړي دغه تورونه رد کړي دي.
د هغه له محکومیتونو څخه ډېری یې یا ځنډول شوي او یا بېرته لغوه شوي، او د ځینو قضیو د استېناف بهیر هم روان دی.
بلخوا، د پاکستان تحریک انصاف ګوند اعلان کړی چې د عمران خان د خوشې کېدو لپاره به د روان کال د سپټمبر په ۲۷مه په ټول پاکستان کې پراخ لاریونونه ترسره کړي.
لیکوال:سعید سمیر
