د هند د بهرنیو چارو وزارت ویلي، چې د افغانستان د ماشومانو د معافیت پروګرام د پیاوړتیا لپاره یې ۲۰ ټنه د بيسيجي، ټېټانوس او ډېفتریا واکسینونه او اړوند طبي توکي کابل ته استولي دي.
دغه وزارت د جمعې په ورځ، د غبرګولي لومړۍ نېټه، په اېکس کې لیکلي چې دا مرستې د افغانستان د روغتیايي سکتور د ملاتړ او د ماشومانو د معافیت د کچې د لوړولو په موخه ترسره شوې دي.
د هندي چارواکو په وینا، په دغې مرستندویه کڅوړه کې د بيسيجي، ټېټانوس او ډېفتریا واکسینونو د چمتو کولو لپاره ځانګړي وچ مواد هم شامل دي، چې د ماشومانو د روغتیا ساتنې او د ساري ناروغیو د مخنیوي لپاره مهم بلل کېږي.
هند ویلي، دا یوازې د طبي مرستو یوه برخه ده او په نږدې راتلونکي کې به نورې ورته مرستې هم افغانستان ته ولېږل شي. د نوي ډیلي په خبره، د دغو مرستو دوام به د افغانستان د روغتیايي اړتیاوو د پوره کولو لپاره مهم رول ولوبوي.
د هند حکومت ټینګار کړی، چې د افغانستان له خلکو سره د روغتیا په برخه کې خپلې مرستې او همکارۍ ته ژمن دی او د روغتیايي خدمتونو د ښه والي او د ماشومانو د ژوند ژغورلو لپاره به خپلو همکاریو ته دوام ورکړي.
لیکوال:سعید سمیر
