د ایران د کورنیو چارو وزارت د بهرنیو اتباعو د چارو د مرکز مشر، نادر یار احمدي، وايي چې په دغه هېواد کې د بهرنیو زدهکوونکو شمېر له شاوخوا ۶۰۰ زرو څخه ۳۲۰ زرو ته راکم شوی دی. نوموړي همداراز ویلي چې د اسلامي جمهوریت له خوا د کډوالو د استوګنې د جواز د تمدید لپاره لا سخت شرایط وضع شوي دي.
د ایران د اسلامي جمهوریت د پوهنې وزارت تر دې وړاندې اعلان کړی و چې په دغه هېواد کې شاوخوا ۶۰۰ زره افغان زدهکوونکي په زدهکړو بوخت دي. خو نادر یار احمدي د دغه شمېر د شاوخوا ۲۸۰ زرو کموالي خبر ورکړی او اوسنی د بهرنیو زدهکوونکو شمېر یې نږدې ۳۲۰ زره ښودلی دی.
د دې کموالي یوه مهمه برخه د کډوالو له شړلو او بېرته ستنېدو سره تړاو لري. نادر یار احمدي ویلي چې تېر کال نږدې ۱.۸ میلیونه بېاسناده کډوال له ایران څخه ایستل شوي دي. د هغه په وینا، په دغه هېواد کې د بهرنیو اتباعو شمېر هم له ۶.۱ میلیونو څخه تر پنځو میلیونو کم شوی دی.
دا څرګندونې په داسې شرایطو کې کېږي چې په افغانستان کې د طالبانو تر واکمنۍ لاندې ښوونیز نظام له پراخو محدودیتونو سره مخ دی. سلګونه زره نجونې له شپږم ټولګي څخه پورته د زدهکړو له دوام څخه بېبرخې دي او طالبان نږدې پنځه کاله کېږي چې د نجونو پر مخ د منځنیو او لیسو دروازې تړلي دي.
تر دې وړاندې هم په ایران کې د افغان زدهکوونکو د نوملیکنې د منع یا محدودیت په اړه ګڼ راپورونه خپاره شوي دي. فارس، کرمان او کهگیلویه او بویراحمد هغه ولایتونه دي چې په پخوانیو راپورونو کې په دغو سیمو کې په ښوونیزو مرکزونو کې د افغان زدهکوونکو د نوملیکنې د محدودیت موارد یاد شوي دي.
لیکواله:سلیمه آریایي
