د بریټانیا د بهرنیو چارو وزارت اعلان کړی چې د ایران اسلامي جمهوریت د سفارت شارژډافیر، علي نسیمفر، یې په لندن کې احضار کړی دی. دا اقدام د هغو تورونو له امله شوی چې ګواکي د سپاه پاسداران د قدس ځواک په اروپا کې د بریدونو د ترسره کولو لپاره د نیابتي ډلو په لارښوونه کې لاس لري. دغه وزارت همداراز ویلي چې د ایران اسلامي جمهوریت، سره له پرلهپسې خبرداریو، لا هم هغه څه نه دي درولي چې لندن یې «دښمنانه فعالیتونه» بولي.
د بریټانیا د بهرنیو چارو وزارت په خبرپاڼه کې راغلي چې دغه دیپلوماټ د سېشنبې په ورځ، د چنګاښ په ۲۳مه، احضار شوی دی. د خبرپاڼې له مخې، د سپاه پاسداران د قدس ځواک تورن شوی چې د مارچ او مې ترمنځ یې یوه نیابتي ډله د اروپا په بېلابېلو هېوادونو کې د بریدونو د ترسره کولو لپاره رهبري کړې ده.
د بریټانیا د بهرنیو چارو وزارت د دې ډلې نوم «د یاران راست اسلامي غورځنګ» یاد کړی او د ایران اسلامي جمهوریت ته منسوبې کړنې یې «په بشپړه توګه د نه منلو وړ» بللي دي. په خبرپاڼه کې ویل شوي چې د ایران استخباراتي ادارو، سره له پرلهپسې خبرداریو، نه یوازې د لندن په وینا دغه ادعا شوي فعالیتونه نه دي درولي، بلکې د پراخولو هڅه یې هم کړې ده.
په لندن کې د ایران سفارت د دې خبر تر خپرېدو پورې د خپل شارژډافیر د احضار او مطرح شویو تورونو په اړه غبرګون نه دی ښودلی. د ایران اسلامي جمهوریت تر دې وړاندې هم د هېواد له پولو بهر د عملیاتو لپاره د نیابتي ډلو د کارولو تورونه رد کړي او دا ادعاوې یې نه دي منلې.
دا پرمختګ وروسته له هغې رامنځته شو چې د بریټانیا حکومت د دوشنبې په ورځ د سپاه پاسداران اسلامي انقلاب او له هغه سره تړلې یوه ډله، د نوو قانوني واکونو له مخې چې د بهرنیو دولتونو له لوري د جاسوسۍ، تخریب او ورته فعالیتونو لپاره د نیابتي ډلو د کارولو د مخنیوي په موخه وضع شوي، د امنیتي ګواښ په توګه معرفي کړه.
په مقابل کې، د ایران اسلامي جمهوریت د بریټانیا د حکومت دغه پرېکړه وغندله او په دې یې ټینګار وکړ چې سپاه پاسداران د ایران د رسمي وسلهوالو ځواکونو برخه ده. تهران لندن تورن کړ چې د یوه دولتي بنسټ په نښه کولو سره یې نړیوال قوانین تر پښو لاندې کړي دي.
د قدس ځواک، چې د سپاه پاسداران د بهرنیو عملیاتو څانګه ده، تر دې وړاندې هم د لوېدیځو هېوادونو له لوري له ورته تورونو سره مخ شوی دی. متحده ایالاتو هم څو کاله وړاندې سپاه پاسداران د بهرنیو ترهګریزو سازمانونو په نوملړ کې شامل کړی و.
د لندن او تهران ترمنځ وروستي کړکېچونه په داسې حال کې زیات شوي چې بریټانیا په ورته وخت کې پر هغو شبکو هم فشارونه زیات کړي چې د بندیزونو د لرې کولو په تور تورنې دي؛ د هغو له ډلې یوه هغه شبکه ده چې محمدحسین شمخاني، د علي شمخاني زوی، ته منسوبه بلل کېږي. په مقابل کې، د ایران چارواکو دغه تورونه او اقدامات رد کړي او هغه یې سیاسي انګېزه لرونکي بللي دي.
لیکواله:سلیمه آریایي
