په ملګرو ملتونو کې د پاکستان د دایمي استازولۍ سلاکار، محمد جواد اجمل، هند تورن کړی چې له وسلهوالو ډلو ملاتړ کوي او په افغانستان کې له نیابتي شبکو څخه په استفادې په پاکستان کې د ناامنۍ د رامنځته کولو هڅې کوي.
اجمل په ملګرو ملتونو کې د هند د استازي د څرګندونو په غبرګون کې ویلي، اسلاماباد د هغه څه له پایلو زیانمن شوی چې دی یې د پاکستان په خاوره کې د «ترهګرۍ په برخه کې د هند ملاتړ» بولي. نوموړي ادعا کړې چې هند په افغانستان کې د خپلو شبکو له لارې د پاکستاني طالبانو تحریک (ټي ټي پي) او د بلوچستان د ازادۍ پوځ (بي اېل اې) په ګډون له ځینو ډلو ملاتړ کوي.
دغه پاکستاني ډیپلوماټ زیاته کړې چې اسلاماباد په تېرو کلونو کې څو ځله نړیوالې ټولنې ته د هغو فعالیتونو په اړه خبرداری ورکړی چې د ده په وینا، هند یې په سیمه کې د اختلافاتو او بېثباتۍ د زیاتولو لپاره ترسره کوي.
اجمل همدارنګه هند پر پوله هاخوا د عملیاتو په ترسره کولو تورن کړی او ویلي یې دي چې د دغه هېواد ادعا شوي فعالیتونه یوازې تر سیمې محدود نه دي. نوموړي په بهرنیو هېوادونو کې د هند د مخالفینو د ترور په اړه راپورونو ته اشاره کړې او دغه موارد یې د هغه څه یوه برخه بللې چې دی یې د نوي ډیلي «غیرقانوني اقدامات» بولي.
خو اجمل په خپلو وروستیو څرګندونو کې د دغو ادعاوو د ثابتولو لپاره کوم مشخص شواهد نه دي وړاندې کړي. هند هم تر اوسه د نوموړي د دغو څرګندونو په غبرګون کې نوې تبصره نه ده کړې؛ خو د دغه هېواد استازو په تېرو ناستو کې د پاکستان ورته تورونه رد کړي او اسلاماباد یې تورن کړی چې خپلې کورنۍ امنیتي ستونزې پر هند ور اچوي.
د پاکستان استازي په خپلو خبرو کې ټینګار کړی چې هېواد به یې د خپلې ملي واکمنۍ، ځمکنۍ بشپړتیا او د خپلو وګړو د امنیت د ساتنې لپاره اقدامات وکړي. هغه له نړیوالې ټولنې هم غوښتي چې د هند له لوري د وسلهوالو ډلو د ملاتړ په اړه د اسلاماباد ادعاوې جدي ونیسي.
په وروستیو کلونو کې د ترهګرۍ، د وسلهوالو ډلو د فعالیتونو او د افغانستان د خاورې د احتمالي کارونې په اړه د هند او پاکستان ترمنځ اختلافات څو ځله په نړیوالو غونډو، په ځانګړې توګه د ملګرو ملتونو په سازمان کې، د بحث او لانجې موضوع ګرځېدلي دي.
لیکواله:رویا ستانکزی
