پخوانی امریکايي سفیر: په کابل کې د سفارت بیا پرانیستل د طالبانو د پالیسو له بدلون سره مشروط دي.
په افغانستان کې د امریکا پخوانی سفیر، رونالډ نیومن، وایي چې د طالبانو تر واکمنۍ لاندې په کابل کې د امریکا د سفارت بیا پرانیستل د تصور وړ دي، خو دا اقدام باید د طالبانو د پالیسیو له مشخصو بدلونونو سره مشروط وي.
نیومن له «آی۲۴ نیوز» شبکې سره په مرکه کې وویل چې واشنګټن له طالبانو سره د جدي اختلافونو سربېره، په ځینو برخو کې، په ځانګړي ډول د امریکايي اتباعو د خوشې کولو او د ترهګرۍ پر وړاندې د مبارزې په برخه کې، له دې ډلې سره لا هم په عملي ډول تعامل کوي.
هغه ټینګار وکړ چې د ښځو او نجونو په اړه د طالبانو پالیسي له امریکا سره د اړیکو د نږدې کېدو پر وړاندې یو مهم خنډ دی او په دغو پالیسیو کې بدلون د سفارت د بیا پرانیستلو لپاره ځانګړی اهمیت لري.
نیومن وویل: «هو، زه کولای شم په کابل کې سفارت ته د امریکا د بیرغ د بېرته راګرځېدو تصور وکړم»، خو خبرداری یې ورکړ چې واشنګټن باید د طالبانو له لوري د مشخص اقدام له ترلاسه کولو پرته، د سفارت د بیا پرانیستلو په څېر امتیازات ور نه کړي.
هغه زیاته کړه: «یوازې باید واقعي اقدام د واقعي اقدام په بدل کې وشي» او ویې ویل چې د دواړو لورو ترمنځ هر ډول بیا نږدې کېدل باید تدریجي وي او د طالبانو پر عملي اقداماتو ولاړ وي.
په کابل کې د امریکا سفارت د ۲۰۲۱ کال له اګست راهیسې تړلی دی او متحده ایالاتو تر اوسه د طالبانو حکومت په رسمیت نه دی پېژندلی. نیومن همداراز خبرداری ورکړ چې له افغانستان سره د هر ډول تعامل بشپړ پرېکون ښايي د واشنګټن لپاره امنیتي پایلې ولري.
لیکواله:سلیمه آریایي
