د پرتګال هېواد د النصر کلب ستوری، کریستیانو رونالډو، د سعودي عربستان د مسلکي لیګ د تر ټولو ډېر عاید لرونکو لوبغاړو په نوملړ کې لومړی مقام لري. خپاره شوي اټکلونه ښيي چې د هغه اوونیز عاید نږدې ۴ میلیونه یورو دی.
د سعودي عربستان د ورزشي رسنیو د خپرو شویو شمېرو او د لوبغاړو د معاشونو اړوندو معلوماتو له مخې، رونالډو د دې لیګ د نورو مشهورو ستورو په پرتله د پام وړ توپیر سره د تر ټولو لوړ معاش لرونکو لوبغاړو په نوملړ کې لومړی ځای خپل کړی دی.
د دغو اټکلونو پر بنسټ، د رونالډو اوونیز معاش شاوخوا ۴ میلیونه یورو دی. دا رقم د هغه د قرارداد له مخې ترلاسه کېدونکي معاش پورې اړه لري او ښايي د اعلانونو، سوداګریزو قراردادونو او نورو اقتصادي فعالیتونو له لارې د هغه عواید پکې شامل نه وي.
د فرانسې هېواد مهاجم او د الاتحاد کلب لوبغاړی کریم بنزیما، چې اوونیز معاش یې شاوخوا ۲ میلیونه او ۳۰۰ زره یورو اټکل شوی، په دې نوملړ کې دویم ځای لري. تر هغه وروسته د النصر سېنېګالي ستوری سادیو مانه، چې په اوونۍ کې شاوخوا ۷۷۰ زره یورو ترلاسه کوي، درېیم مقام لري.
رونالډو په ۲۰۲۲ کال کې د کال په پای کې له النصر سره تر یوځای کېدو راهیسې د نړۍ له تر ټولو ډېرو عاید لرونکو فوټبالرانو څخه دی. له سعودي کلب سره د هغه قرارداد او په دغه هېواد کې د هغه د حضور اړوند عوایدو د ورزشي رسنیو پراخه پاملرنه ځانه ته اړولې ده.
د رونالډو لوړ عاید د سعودي عربستان د مسلکي لیګ له لوري د نړۍ د مشهورو فوټبالرانو د جذب د بهیر یوه برخه ده. دغه لیګ په وروستیو کلونو کې د پراخو پانګونو له لارې ګڼ شمېر نړیوال مشهور لوبغاړي خپلو کلبونو ته جذب کړي دي.
خو په سعودي فوټبال کې د لوبغاړو د عوایدو کره شمېرې تل د کلبونو له خوا په رسمي ډول نه خپرېږي. له همدې امله، په رسنیو او تخصصي وېبپاڼو کې خپاره شوي ارقام ښايي د معاشونو، انعامونو او قراردادي امتیازاتو د محاسبې د طریقې له مخې له یو بل سره توپیر ولري.
لیکواله:سلیمه آریایي
