د ۲۰۲۶ کال د فوټبال نړیوال جام د تر ټولو زیات ګولونو د ثبت له مخې د دې سیالیو په تاریخ کې د تر ټولو ډېر ګول وهنو دوره ګرځېدلې ده. دا ریکارډ د پنجشنبې په ورځ د امریکا او ترکیې ترمنځ د څلورم ګروپ د لوبې پر مهال ثبت شو.
د امریکا ملي لوبډلې مدافع، آستون تراستي، د دې لوبې لومړی ګول وواهه او د ۲۰۲۶ د نړیوال جام د ګولونو شمېر یې ۱۷۳ ته ورساوه، چې په دې توګه یې د قطر د ۲۰۲۲ نړیوال جام ۱۷۲ ګولونو پخوانی ریکارډ مات کړ.
وروسته په همدې لوبه کې نور څلور ګولونه هم وشول او د دې دورې ټول ګولونه ۱۷۷ ته لوړ شول. په پای کې د ترکیې ملي لوبډلې د ۳ پر ۲ پایلې سره امریکا ته ماته ورکړه او دا لوبه د یو تاریخي ریکارډ شاهده وه.
د یادونې وړ ده چې نوی ریکارډ یوازې د ۲۰۲۶ نړیوال جام په ۵۹مه لوبه کې ثبت شو، په داسې حال کې چې پخوانی ریکارډ، یعنې ۱۷۲ ګولونه، د قطر د ۲۰۲۲ نړیوال جام په ټولیزو ۶۴ لوبو کې ترلاسه شوي و.
د ۲۰۲۶ نړیوال جام د ۴۸ ټیمونو په ګډون ترسره کېږي او د لوبو شمېر له ۶۴ څخه ۱۰۴ ته لوړ شوی دی. د ټیمونو او سیالیو زیاتوالی د ګول وهلو او د تاریخي ریکارډونو د ماتېدو لپاره زیات فرصتونه برابر کړي دي.
د فیفا رئیس جیاني انفانتینو په خپله انسټاګرام پاڼه کې د دې لاسته راوړنې هرکلی کړی او لیکلي یې دي: «د قطر د ۱۷۲ ګولونو د ریکارډ ماتېدل د دې څرګندونه کوي چې د ۲۰۲۶ نړیوال جام څومره په زړه پورې، هجومي او د لوړې کچې سیالۍ لري، چې دا جام به د تاریخ له تر ټولو یادګاري دورو څخه وي.»
لیکواله:سلیمه آریایي
