د اسلامي همکاریو سازمان نهمه غونډه چې د ښځو د حقونو د دفاع او د هغوی د پیاوړتیا په محور جوړه شوې، د پاکستان په پلازمېنه اسلاماباد کې د غړو هېوادونو د وزیرانو او لوړپوړو پلاوو په ګډون پیل شوه. په دې غونډه کې د اسلامي هېوادونو په ټولنو کې د ښځو د ټولنیز، اقتصادي او سیاسي رول پر پیاوړتیا تمرکز کېږي.
دا پروګرام په ګډه د اسلامي همکاریو سازمان او د پاکستان د بشري حقونو وزارت له خوا جوړ شوی دی. د ښځو او کورنیو چارو وزیرانې، لوړپوړي چارواکي او د اسلامي همکاریو سازمان د غړو هېوادونو استازي په دې غونډه کې ګډون لري او د اسلامي نړۍ د ښځو د وضعیت په اړه خبرې اترې کوي.
د اسلامي همکاریو سازمان ویلي، چې دا غونډه د دغه سازمان د ۲۰۲۱ کال د قاهرې کنفرانس د بحثونو د دوام په توګه ترسره کېږي. د سازمان په وینا، د دې غونډې موخه د ښځو د ملاتړ لپاره د تګلارو جوړول او د راتلونکي لپاره د لیدلورو ټاکل دي، څو په اسلامي ټولنو کې د ښځو ونډه لا پراخه شي.
د جوړوونکو د معلوماتو له مخې، د دې غونډې مهم موضوعات د ښځو لپاره د زدهکړې فرصتونو پراختیا، د فردي او مسلکي وړتیاوو لوړول، په اقتصادي او چاپېریالي پالیسیو کې د ښځو د ګډون زیاتول، او د هغوی د پیاوړتیا لپاره د لارو چارو ارزونه ده.
دا غونډه په داسې حال کې ترسره کېږي چې د ښځو حقونه، زدهکړه، کار او ټولنیز حضور لا هم په یو شمېر اسلامي هېوادونو، په ځانګړې توګه افغانستان کې، د کورنیو او نړیوالو بحثونو له مهمو موضوعاتو څخه دي.
لیکواله:سلیمه آریایي
