د افغانستان ښځینه کرېکټ ملي لوبډلې له پنځه کلن ځنډ وروسته په انګلستان کې خپله لومړۍ دوستانه لوبه په بریا سره ترسره کړه او د انګلستان د اېم سي سي فاونډېشن لوبډلې ته یې ماته ورکړه.
دا لومړی ځل دی چې افغان ښځینه کرېکټرانې په تېرو پنځو کلونو کې بېرته سیالیو ته راګرځي او خپل نوی سفر د بریا په ترلاسه کولو سره پیلوي.
د دې تاریخي بریا له ثبتېدو وروسته، د لوبغاړو د خوښۍ او نمانځنې ویډیوګانې په ټولنیزو رسنیو کې پراخې خپرې شوې. په دغو ویډیوګانو کې لوبغاړې د سفر په بس کې د بریا خوشالي لمانځي، چې ډېرو خلکو ته یې د ۲۰۲۳ کال هغه صحنې ور په یاد کړې چې د افغانستان د نارینهوو ملي لوبډلې له پاکستان څخه د بریا وروسته په ورته ډول نمانځنه کړې وه.
د افغان ښځینه کرېکټ لوبډلې دغه بریا د ګڼو افغانانو له تود هرکلي سره مخ شوې ده. د ټولنیزو رسنیو ډېرو کاروونکو لوبغاړو ته مبارکي ورکړې او هیله یې څرګنده کړې چې په راتلونکو سیالیو کې هم د افغانستان لپاره نورې بریاوې خپلې کړي.
لیکوال:سعید سمیر
