د امریکا ولسمشر ډونالډ ټرمپ ویلي، ایران له امریکا سره د یوې هوکړې د ترلاسه کولو هڅه کوي، خو خبرداری یې ورکړی چې که تهران هر ډول برید ترسره کړي، واشنګټن به ورته څو برابره سخت غبرګون وښيي.
د اکسیوس د راپور له مخې، ټرمپ د «ایر فورس ون» الوتکې په ترڅ کې له خبریالانو سره په خبرو کې ویلي، ایراني چارواکو څه موده وړاندې ورسره اړیکه نیولې او د یوې هوکړې د ترلاسه کولو هیله یې څرګنده کړې ده.
هغه زیاته کړه، د چهارشنبې په ورځ د امریکا له لوري پر ایران ترسره شوي بریدونه د ایران له لوري پر سوداګریزو بېړیو د بریدونو په ځواب کې شوي او د غبرګون کچه یې «یو پر شل» وه.
ټرمپ ټینګار وکړ: «موږ پر هغوی ډېر سخت ګوزار وکړ. هر کله چې هغوی برید وکړي، موږ به څو چنده سخت ځواب ورکړو.»
د امریکا ولسمشر د ایران او امریکا ترمنځ د احتمالي هوکړې په اړه نور جزییات ورنه کړل، خو دا څرګندونې داسې مهال کوي چې د دواړو هېوادونو ترمنځ سیمهییز کړکېچ او پوځي ترینګلتیا لا هم دوام لري.
لیکوال:سعید سمیر
