د امریکا د بهرنیو چارو وزارت د چهارشنبې په ورځ اعلان وکړ چې له سعودي عربستان سره یې د شاوخوا دوه میلیارده ډالرو په ارزښت د پوځي تجهیزاتو د پلور موافقه کړې ده.
د یاد وزارت د اعلامیې له مخې، دا پرېکړه د امریکا د بهرني سیاست او ملي امنیت د موخو د ملاتړ لپاره شوې او هدف یې د سیمې د یوه مهم متحد د دفاعي وړتیاوو پیاوړتیا ده.
په اعلامیه کې همدارنګه ویل شوي چې سعودي عربستان، د ناټو له غړیتوب پرته د امریکا د یوه مهم متحد په توګه، د خلیج په سیمه کې د سیاسي ثبات او اقتصادي پرمختګ په ساتلو کې مهم رول لري.
د امریکا او ایران ترمنځ د نازک اوربند له ماتېدو وروسته، د ایران اسلامي جمهوریت د چهارشنبې په ورځ، د چنګاښ ۲۴مه، د توغندیو او بېپیلوټه الوتکو په وسیله د سیمې ځینې هېوادونه په نښه کړل.
په ځواب کې، د امریکا د مرکزي قوماندانۍ سینټکام اعلان کړی چې د چهارشنبې په ورځ یې د ایران پر ضد د بریدونو نوې څپه پیل کړې ده.
لیکواله:سلیمه آریایي
