د اوکراین ولسمشر، ولودیمیر زلنسکي، اعلان کړی چې هوډ لري د دغه هېواد لومړۍ وزیره، یولیا سوېریدنکو له خپلې دندې ګوښه کړي؛ هغه اقدام چې که قانوني پړاوونه یې بشپړ شي، د دغه هېواد د حکومت د استعفا لامل به شي.
زلنسکي د یکشنبې په ورځ، د جولای ۱۲مه، په اېکس ټولنیزه شبکه کې لیکلي چې دا بدلونونه د «نوي سیاسي ستراتیژۍ» د پلي کولو په لړ کې ترسره کېږي. د هغه په وینا، دا پروګرام به د حکومت سربېره، د قانون پلي کوونکو بنسټونو په مشرتابه کې هم بدلونونه راولي.
د اوکراین ولسمشر د یولیا سوېریدنکو د کړنو د ستاینې ترڅنګ اعلان وکړ چې هغې ته د اوکراین له یوه کلیدي شریک سره د اړیکو په برخه کې نوی مسوولیت وړاندیز شوی دی. له دې سره سره، هغه لا تر اوسه د نوي حکومت د جوړولو لپاره کوم کس نه دی معرفي کړی.
دا اوکراینۍ اقتصاد پوهه، یولیا سوېریدنکو د ۲۰۲۵ کال په جولای کې او د اقتصادي پراختیا او سوداګرۍ په چارو کې د لومړي وزیر د مرستیالې په توګه له څو کلونو فعالیت وروسته، د دغه هېواد د لومړۍ وزیرې په توګه وټاکل شوه.
د اوکراین د قانون له مخې، د لومړۍ وزیرې استعفا باید د پارلمان لخوا تصویب شي او د تایید په صورت کې به یې د حکومت ټوله کابینه هم استعفا وکړي.
په همدې حال کې، اوکرایني رسنیو د ډینیس شمیهال، میخایلو فدوروف او سرهي کورټسکي نومونه د یولیا سوېریدنکو د احتمالي ځایناستو په توګه یاد کړي دي.
لیکواله:سلیمه آریایي
