د طالبانو د صنعت او سوداګرۍ وزارت وایي، له پاکستان سره د لارو تر بندېدو وروسته د حیرتان بندر له لارې د افغانستان سوداګري له منځنۍ اسیا هېوادونو سره پراخه شوې ده. د وزارت ویاند عبدالسلام جواد ویلي، چې په ۲۰۲۵ کال کې د افغانستان صادرات له ۱۲۲ میلیونه ډالرو څخه ۲۱۶ میلیونه ډالرو ته لوړ شوي، چې ۷۷ سلنه زیاتوالی ښيي، او واردات له یو میلیارد او ۶۷۰ میلیونه ډالرو څخه دوه میلیارد او ۳۹۰ میلیونه ډالرو ته رسېدلي، چې ۴۳ سلنه زیاتوالی ښيي.
د بلخ ولایت د پانګونې خونې د دارالانشا رییس اسدالله اسدي وايي، افغانستان د منځنۍ اسیا هېوادونو لپاره د یوه مهم ترانزیټي څلورلارې په توګه بدلېږي، چې د سوداګرۍ د پراختیا لامل ګرځي. د معلوماتو له مخې، ازبکستان په ځانګړي ډول د افغانستان له سوداګریزو شریکانو څخه دی، او یوازې په تېرو دوو میاشتو کې د ۲۱۰ میلیونه ډالرو په ارزښت سوداګریز تړونونه لاسلیک شوي دي.
خو سوداګر وایي، سره له دې چې سوداګري پراخه شوې، د ویزو ترلاسه کول، د پیسو لېږد ستونزې او د وارداتو لګښتونه لا هم لوړ پاتې دي.
لیکوال:سعید سمیر
