امیتاب باچان، د هند د سینما نامتو لوبغاړی، ایران ته د کبډي د نړیوال جام د سیالیو د ګډون لپاره بلل شوی دی. خو ایران ته د هغه سفر تر اوسه قطعي شوی نه دی او د دغه هېواد د کبډي فدراسیون مشر ویلي، چې په دې سیالیو کې د نوموړي د ګډون لپاره به د زمینې د برابرولو هڅې وکړي.
«همشهري» ورځپاڼې د جمعې په ورځ، د زمري ۱۶مه، د ایران د کبډي فدراسیون د مشر د یوې ویډیو په خپرولو سره راپور ورکړی چې دغه فدراسیون هڅه کوي امیتاب باچان په ایران کې د کبډي نړیوال جام د ترسره کېدو پر مهال دغه هېواد ته راوبولي.
د ایران د کبډي فدراسیون مشر د هند د سینما د مینهوالو ترمنځ د امیتاب باچان مقام ته په اشارې ویلي، چې په دغو سیالیو کې د نوموړي د ګډون لپاره به د زمینې برابرولو هڅې وکړي. خو تر اوسه ایران ته د هغه د احتمالي سفر د وخت یا په دغو سیالیو کې د هغه د قطعي ګډون په اړه جزیات نه دي ورکړل شوي.
امیتاب باچان له څه باندې پنځو لسیزو راهیسې د هند په سینما کې فعالیت کوي او د دغه صنعت له مشهورو څېرو څخه ګڼل کېږي. نوموړي په «شعله»، «دیوار» او «زنجیر» په څېر فلمونو کې د لوبېدو له امله په هند او له دغه هېواده بهر پراخه شهرت ترلاسه کړی دی.
لیکواله:سلیمه آریایي
