په جرمني کې مېشتو یو شمېر افغانانو د برلین په ښار کې د اعتراضي غونډې په جوړولو سره د افغانستان له ښځو او خلکو څخه خپل ملاتړ اعلان کړ. د دې لاریون ګډونوالو وویل چې د دوی د راټولېدو موخه د افغانستان د خلکو، په ځانګړي ډول د ښځو، غږ نړیوالې ټولنې ته رسول دي.
لاریون کوونکو د غونډې پر مهال شعارونه ورکول، لکه: «تر څو چې طالبان له منځه نه وي تللي، دا وطن به وطن نه شي»، «ډوډۍ، کار، ازادي»، «طالبانو ته نه» او «جنسیتي اپارتاید ته نه». دوی د افغانانو لپاره د اساسي حقونو، فردي ازادیو او انساني کرامت د خوندي کېدو غوښتنه وکړه.
ګډونوالو همدارنګه د ښځو د حقونو د ملاتړ، د نجونو د زدهکړو، د کار حق او مدني ازادیو ته د لاسرسي پر اړتیا ټینګار وکړ. هغوی له نړیوالې ټولنې وغوښتل چې د افغانستان اوسني وضعیت ته بېپامه پاتې نه شي او د دې هېواد د وګړو د حقونو د ملاتړ لپاره لا اغېزمن ګامونه پورته کړي.
لاریون کوونکو په خپلو ویناوو او پیغامونو کې هغو محدودیتونو ته اشاره وکړه چې په وروستیو کلونو کې د افغانستان پر ښځو او نجونو لګېدلي دي. دوی ټینګار وکړ چې ښځې او نجونې په بېلابېلو برخو، په ځانګړي ډول د زدهکړو او کار په برخه کې، له پراخو محدودیتونو سره مخ دي.
دا اعتراضیه غونډه په داسې حال کې ترسره شوه چې د افغانستان د ښځو د حقونو او مدني ازادیو په اړه اندېښنې لا هم دوام لري. ګډونوالو له نړیوالو بنسټونو او د نړۍ له حکومتونو وغوښتل چې د افغانستان د خلکو غوښتنو ته لا ډېره پاملرنه وکړي.
د اعتراض کوونکو په وینا، سره له دې چې په وروستیو کلونو کې د طالبانو د تګلارو پر وړاندې نړیوالې نیوکې او پراخ غبرګونونه شوي، خو پر ښځو او ځینو ټولنیزو ازادیو لګېدلي محدودیتونه لا هم دوام لري او په ځینو برخو کې لا زیات شوي هم دي.
لیکواله:سلیمه آریایي
