د هېواد پخواني ولسمشر حامد کرزي د افغانې پاراتکوانډو لوبغاړې ذکیه خدادادي له لوري د اروپا د ۲۰۲۶ کال پاراتکوانډو سیالیو کې د سرو زرو مډال ګټل ستایلي او هغې ته یې مبارکي ویلې ده.
کرزي په خپل پیغام کې ویلي، د ذکیه خدادادي وروستۍ بریا د افغانانو لپاره د خوښۍ او ویاړ وړ ده. هغه هیله څرګنده کړې چې نوموړې به په راتلونکو نړیوالو سیالیو کې هم لا ډېرې بریاوې خپلې کړي.
ذکیه خدادادي د جرمني د مونیخ ښار په کوربتوب ترسره شوو دغو سیالیو کې په پایلوبه کې خپلې ترکي سیالې ته ماته ورکړه او د سرو زرو مډال یې ترلاسه کړ.
نوموړې په دې سیالیو کې د فرانسې په استازیتوب ګډون کړی و. خدادادي تر دې وړاندې هم په ۲۰۲۳ کال کې د اروپا د پاراتکوانډو سیالیو د سرو زرو مډال ګټونکې شوې وه.
لیکوال:سعید سمیر
